The Coggie

Line
Melody - "Cauld kail in Aberdeen"
Line

Robert Tannahill

When Poortith cauld, and sour Disdain,
Hang owre life's vale sae foggie,
The sun that brightens up the scene,
Is Friendship's kindly coggie:
Then, O revere the coggie, sirs!
The friendly, social coggie!
It gars the wheels of life rin light,
Though e'er sae doilt and cloggie.

2. Let Pride in Fortune's chariots fly,
Sae empty, vain, and vogie;
The source of wit, the spring of joy,
Lies in the social coggie:
Then, O revere the coggie, sirs!
The independent coggie!
And never snool beneath the frown
Of any selfish roguie.

3. Poor modest Worth, with cheerless e'e,
Sits hurkling in the boggie,
Till she asserts her dignity
By virtue of the coggie:
Then, O revere the coggie, sirs!
The poor man's patron coggie!
It warsels care, it fights life's faughts,
And lifts him frae the boggie.

4. Gi'e feckless Spain her weak snail broo,
Gi'e France her weel spic'd froggie,
Gi'e brother John his luncheon too,
But gi'e to us our coggie:
Then, O revere the coggie, sirs!
Our soul-warm kindred coggie!
Hearts doubly knit in social tie,
When just a wee thought groggie.

5. In days of yore our sturdy sires,
Upon their hills sae scroggie,
Glow'd with true freedom's warmest fires,
And fought to save their coggie:
Then, O revere the coggie, sirs!
Our brave forefathers' coggie!
It rous'd them up to doughty deeds,
O'er which we'll lang be vogie.

6. Then, here's--may Scotland ne'er fa' down,
A cringing coward doggie,
But bauldly stand, and bang the loon
Wha'd reave her of her coggie:
Then, O protect the coggie, sirs!
Our gude auld mither's coggie!
Nor let her luggie e'er be drain'd
By ony foreign roguie.

Line
| Song Index | Home Page |
Line