Tullochgorum

Line
Melody - From Aberdeenshire
Line

From Aberdeenshire, attributed to John Skinner, 1721-1807

And gie's a song, the lady cry'd,
And lay your disputes a' aside
What signifies't for folks to chide
For what was done before them
Let Whig and Tory a' agree
Whig and Tory, Whig and Tory
Whig and Tory a' agree
To drop their Whig-malorum
Let Whig and Tory all agree
To spend the night in mirth and glee
And cheerful sing alang wi' me
The Reel o' Tullochgorum.

2. O Tullochgorum's my delight,
It gars us a' in ane unite
And ony sumph that keeps up spite,
In conscience I abhor him
For blythe and merry we'll be a'
Blythe and merry, blythe and merry
Blythe and merry we'll be a',
And make a happy quorum
For blythe and merry we'll be a'
As lang as we hae breath tae draw
And dance till we be like to fa',
The Reel o' Tullochgorum.

3. What needs there be sae great a fraise
Like dringing dull Italian lays
I wadna gie our ain strathspeys
For half a hunder score o' them
They're dowf and dowie at the best
Dowf and dowie, dowf and dowie
Dowf and dowie at the best
Wi' a' their variorum
They're dowf and dowie at the best,
Their allegros and a' the rest
They canna please a Highland taste
Compar'd wi' Tullochgorum.

4. May choicest blessings aye attend
Each honest open-hearted friend
And calm and quiet be his end,
And a' that's good watch o'er him
May peace and plenty be his lot
Peace and plenty, peace and plenty
Peace and plenty be his lot,
And dainties a great store o' them
May peace and plenty be his lot
Unstain'd by ony vicious plot
And may he never want a groat
That's fond o' Tullochgorum.

Repeat verse 1.

Line
| Song Index | Home Page |
Line