Geordie

Line
Melody -
Line

Robert Burns

There was a battle in the north,
And nobles there was many,
And they hae kill'd Sir Charlie Hay,
And they laid the wyte on Geordie.

2. O he has written a lang letter,
He sent it to his lady;
Ye maun cum up to Enbrugh town
To see what words o' Geordie.

3. When first she look'd the letter on,
She was baith red and rosy;
But she had na read a word but twa,
Till she wallow't like a lily.

4. Gar get to me my gude grey steed,
My menzie a' gae wi' me;
For I shall neither eat nor drink,
Till Enbrugh town shall see me.

5. And she has mountit her gude grey steed,
Her menzie a' gaed wi' her;
And she did neither eat nor drink
Till Enbrugh town did see her.

6. And first appear'd the fatal block,
And syrie the aix to head him;
And Geordie cumin down the stair,
And bands o airn upon him.

7. But tho' he was chain'd in fetters strang,
O airn and steel sae heavy,
There was na ane in a'the court,
Sae bruw a Man as Geordie.

8. O she's down on her bended knee,
I wat she's pale and weary,
O pardon, pardon, noble king,
And gie me back my Dearie!

9. I hae born seven sons to my Geordie dear,
The seventh ne'er saw his daddie:
O pardon, pardon, noble king,
Pity a waefu' lady!

10. Gar bid the headin-man mak haste!
Our king reply'd fu' lordly:
O noble king, tak a'that's mine,
But gie me back my Geordie.

11. The Gordons cam and the Gordons ran,
And they were stark and steady;
And ay the word amang them a'
Was, Gordons keep you ready.

12. An aged lord at the king's right hand
Says, noble king, but hear me:
Gar her tell down five thousand pound
And gie her back her Dearie.

13. Some gae her marks, some gae her crowns,
Some gae her dollars many;
And shes tell'd down five thousand pound,
And she's gotten, again her Dearie.

14. She blinkit blythe in her Geordie's face,
Says, dear I've bought thee, Geordie:
But there sud been bluidy bouks on the green,
Or I had tint my laddie.

15. He claspit her by the middle sma',
And he kist her lips sae rosy:
The fairest flower o' woman-kind
Is my sweet, bonie Lady!

Line
| Song Index | Home Page |
Line