Glenlogie

Line
Melody - Seq. by Barry Taylor
Line

There wis nine and nine nobles
Rode through Banchory fair,
And bonnie Glenlogie,
Wis the pride that wis there;
There wis six and six maidens
Dined in the King's ha,
Bonnie Jean o Bethelnie
Wis the flooer o them aa.

2. Doun cam Jeannie Meldrum,
She cam trippin dounstair,
And she's chosen Glenlogie
Amang aa that wis there;
She called on his footboy,
Who walked by his side,
Spierin, "Fa is that young man,
An far does he bide?"

3. "Oh he's titled Glenlogie
Fan he is at hame,
He's of the noble Gordons,
Lord John is his name."
"Oh Glenlogie, Glenlogie,
If ye should prove kind,
My love it is laid on ye,
I've made up my mind."

4. Oh he turned aboot lichtly,
As the Gordon's dee aa,
"Oh thank you Jeanie Meldrum,
Bit I'm promised awa."
She called on her handmaids
Tae mak her a bed,
Wi ribbons an napkins
To tie up her head.

5. "Oh lay me doun gently
Wi ma face tae the wa,
Tak the rings fae ma fingers,
My jewels an aa."
Noo up spak her faither,
A wae man wis he,
"Ach! I'll wad ye tae Dunfermline,
He's mair gowd than he."

6. "Oh na, na dear faither,
Oh na that winna dee,
If I canna get Glenlogie,
For him I will dee."
Her faither's ain chaplain,
A man o great skill,
He wrote a braid letter,
An indited it weel.

7. "Oh, pox! on ye Logie,
Oh must it be so,
This lass has laid her love on ye,
Must she dee in her woe?"
When Glenlogie got the letter,
A licht lauch gart he,
But fen he read the letter,
A tear blinned his ee.

8. "Oh saddle my black horse,
And saddle my broun,
Bonnie Jean o Bethelnie
'll be deid e'er I win."
Fen he got tae Bethelnie,
There wis naethin there,
But weepin an wailin,
Vexation an care.

9. Oh pale and wan was she
When Glenlogie cam in,
But reid and rosy grew she
When she kent it wis him.
"Turn roun Jeannie Meldrum,
Turn tae your richt side,
And I'll be your bridegroom,
If ye'll be my bride."

10. Noo Jeannie's got mairrit
An her tocher doun tauld,
Bonnie Jean o Bethelnie
Wis sixteen year auld.
Bethelnie, Bethelnie,
Ye'll shine whar ye stan,
And the hedder bells aa roun ye
Shine on Fyvie's lan.


This ballad is often known by the alternative title Jean o Bethelnie, as in the earliest form of the ballad provided to F.J. Child in 1768. Jean is in some versions Jeanie Gordon and in others Jeanie Melville. Jeanie Meldrum came from a family of landowning gentry who at one time owned Fyvie, Meldrum and Tolquhon Castles and most of the land in between. The Meldrums had sold Fyvie Castle to Alexander Seton who became Lord Fyvie and was created Lord Dunfermline.

Bethelnie is 2 miles north east of Oldmeldrum and around 5 miles south of Fyvie.

Line
| Song Index | Home Page |
Line