Bachelor's Lament
Tak' Pity on Me

Line
Melody -
Line

Oh ladies come listen to my sad lament
And as sure as I'm living you'll never repent
For oh I am wearied, I doubt I will dee
Unless some dear lassie tak' pity on me.

2. Tak' pity on me, tak' pity on me
For oh I am wearied, och hey I could dee
Oh what I wad promise, oh what I wad gie
If some bonnie lassie wad tak' pity on me.

3. My stockings is oot at the heels and the tees
They are some like mysel' they hiv see better days
My breeks they are torn, in fact I could flee
Oh come bonnie lassie tak' pity on me.

4. I sit in my garret the hale evening lang
And croon to mysel' some bit verse o' a sang
But this ane I fear I may sing til I dee
Oh come bonnie lassie tak' pity on me.

5. I've sat and I've sabbit, I've sabbit and sat
And believe me, my dearies, I've groused and I've grat
Just like a wee bairnie atween twa and three
Oh come bonnie lassie, tak' pity on me.

6. I'll nae be peculiar for beauty or wealth
Just a clean tidy body in perfect good health
And her I will promise, oh come or ye see
Oh come bonnie lassie tak' pity on me.

7. I was aince a braw chap, but that days is awa'
When I whistled and sang til the gloamin' did fa'
Just like a wee birdie when up in a tree
Oh come bonnie lassie tak' pity on me.

8. Aye it's true they're awa, for I ken I'm growing auld
My whiskers is gray and my croon geting bald
But I'd yet be as happy as a lamb on a lea
Oh come bonnie lassie tak' pity on me.

9. It cam in my head as I sat doon the nicht
On a cheer by the fire my tobacco to licht
If there is a lassie amang a' that I see
Wad come some fine day and tak' pity on me.

10. I'm a good healthy chap and my features look fine
I stand five fit eicht, my age forty-nine
Altho' I'm nae laird, I'm as happy as can be
If some bonnie lassie tak' pity on me.

11. So noo, my dear lass, if ye will but consent
To tak' pity on me, ye will stop my lament
Ye will stop my lament, then my mind will be free
Oh come bonnie lassie tak' pity on me.

12. So come, bonnie lassie, oh come in the noo
I'll ca' ye my dearie, my duckie, my doo
My sweet little lammie, tho' big ye may be
Oh come bonnie lassie tak' pity on me.

Line
| Song Index | Home Page |
Line